行政會議召集人夏佳理（Ron）尋日就接受電台節目訪問，大家都期待阿Ron會有咩爆炸性言論，但即使佢面對唔少敏感話題，最終都係無得失邊一方。好似提到特首選舉期間，落選人唐英年疑似大爆行會會議內容，阿Ron就表明咁係違反行會保密制，但同時又話候任特首梁振英（CY）即場否認指控，嚴格嚟講亦都有問題喎。
當講到CY早前撰文警告立法會唔好再用「拉布」影響審議下屆政府架構重組建議嘅工作，阿Ron就話，CY並唔係干預立法會，只係擔心上任時仍未完成架構改組啫。但佢又補句口話，即使方案交到立法會時，議員要提問，呢個情況亦係天公地道喎。
就算講到劣績斑斑嘅煲呔曾時，阿Ron依然保持唔得失人嘅本色，竟然話欣賞煲呔曾表現，聽見都打個突，佢同時又寄語CY提出政策前要多聽市民同立法會議員意見咁話。聽完阿Ron嘅訪問，相信大家都聽唔出佢幫邊一方，呢啲咪係老手囉！