政情：卿姐淆底 搵鄭汝樺打底
正當立法會議席出缺安排「拉布」戰進入尾聲，泛民主派議員又正醞釀就下屆政府架構重組建議再次拉布，誓言將會喺財委會上提出多項修訂，兼且打爛沙盆問到篤，以防建議倉卒通過。另一邊廂，建制派中人亦會密切監察財委會主席劉慧卿會否向泛民「放水」，有乜出錯就會向卿姐提出不信任動議喎。未開會就咁火藥味濃，卿姐分分鐘會繼立法會主席曾鈺成後，成為另一個受拉布戰對準嘅槍靶。
呻主席唔易做決定
眼見曾鈺成喺拉布戰一役腹背受敵，卿姐前幾日已多次表明，自己會不偏不倚讓委員有充足發言機會，只要議員提問不離題、不重複，佢絕對唔會好似曾鈺成咁「亂剪布」；又話委員預早提出問題，讓政府作書面答覆，此舉可令委員喺會上只就回覆提出跟進問題，以節省時間。卿姐一早表明立場，無非都係想強調自己會秉公辦理撥款申請，尋日佢仲重提兩年前高鐵撥款拉布一役。
卿姐話，當年立法會審議高鐵撥款嘅後期，運輸及房屋局局長鄭汝樺（Eva）曾心急建議一次過開二十個鐘頭會議，但佢就覺得亂咁劃定開會時限並不可取，於是就叫秘書處逐一向議員查詢，會喺會上問啲乜嘢問題及估計每人發問所需時間，結果計出只需十二個鐘就搞掂，到最後埋單計數，前後用咗廿四個鐘，開咗十三次會議就通過撥款。
卿姐好自豪話，當年處理高鐵撥款後，Eva主動上前同佢salute（致意），翌日仲連花都送埋，但佢就轉送畀立法會秘書長。卿姐之所以重提舊事，好明顯就係淆底，擔心有乜出錯而受到建制派同泛民議員攻擊，甚至要面對建制派嘅不信任動議。不過淆底唔緊要，最緊要有嘢打底，所以佢擺咗Eva上枱打定底，仲話主席作出每個決定都唔容易，但只要鎮定耐心處理就得喎。