中環出更：周松崗接任總商會主席
周松崗自從無做港鐵行政總裁後，反而更加周身唔得閒，早前接手做港交所主席外，尋日更正式接替胡定旭當上總商會主席，真係能者多勞。周松崗一當選就被傳媒追問會否擔心新特首親基層，犧牲商界利益？周主席見慣風浪，大方話唔擔心，因為總商會一向都堅持同政府衷誠合作，加上政府有盈餘做利民措施，相信唔會影響到商界利益喎。
肥胡卸任力撐CY
周主席又話，雖然坊間有聲音希望增加利得稅回饋基層同社會，但佢認為加稅率唔代表稅收一定多咗，如果無好嘅營商環境，稅率加到點都無用。至於剛卸任嘅肥胡，尋日就趁最後機會力撐候任特首梁振英（CY）嘅新政府架構重組建議，仲話要擴大問責制，吸引更多人才入政府。佢仲希望下屆政府多加留意落實CEPA同發展人民幣離岸中心，同CY嘅諗法真係不謀而合。
總商會改選後，會由怡和管理有限公司董事彭耀佳出任常務副主席，而三位副主席分別為長實集團董事總經理兼副主席李澤鉅、香港太古集團主席白紀圖及九龍倉集團副主席兼常務董事吳天海。