一時快感，一世遺憾，呢家嘢係好多人恨錯難返嘅教訓。
譬如話，有人時速二百公里瘋狂駕駛，自以為型仔到爆，點不知砰嘭一嘢，車毀人亡都仲一了百了，死唔去而殘廢咯喎，抱憾終身呀。又譬如話，有人感情缺失亂搞課外活動，自以為風流到痹，點不知高潮幾秒搞出人命，害己害人㗎。
所以話啫，為人處世切忌逞一時之快而輕舉妄動，否則後果堪虞。之不過問題係，貪威識食嘅曾蔭權完全唔曉得呢一條人生大道理，偏偏要滿足一時快感，理得你後果有幾咁令人遺憾。
功夫茶要講嘅係耗資超過五十億元興建嘅添馬艦新政府總部，由於煲呔曾好大喜功，為咗威風八面攞個靚彩，硬係要喺號稱「門常開」嘅新總部發表最後一份施政報告，工程被迫趕工，以致質素參差。趕頭趕命趕完工好大鑊㗎，有警員跌爆肺，有技工觸電死，大樓內又驗出含有退伍軍人症桿菌，明顯係驗收馬虎嘅結果。
趕工吖嘛，馬虎吖嘛，門常開潛伏嘅種種問題喺啟用之後陸續浮現。繼後樓梯水長流變咗一條大瀑布之後，最新揭發嘅甩漏情況係行人通道地磚凹凸不平，凹位最深七毫米，除咗引起行人不便，容易令到穿着斗零踭高跟鞋嘅OL仆低，更加因為地磚嘅凹凸坑紋同盲人引路徑相似，令失明人士產生混淆嘅感覺，有違「無障礙」原則。由於地磚隨時引發意外，政府急急補鑊重鋪地磚。
喂，水長流已經肉酸啦，門常開，人常仆，家陣又害到道路使用者有機會一仆一碌，邊有咁PK㗎！
嗱嗱嗱，你話曾蔭權係咪逞一時之快而一世遺憾吖？門常開斷估會繼續存在一百幾十年，唔知幾時又爆一單甩漏醜聞，終其一生都擺脫唔到呢一個污點。或者到咗百年歸老之日，曾爵士驀然回首會好後悔咁話，早知當初唔貪威趕工啦！
貪威趕工導致工程甩漏，工程甩漏又搞到禍及地球。點解咁講呢？原因係執漏需要耗用大量電力，用電一多就係環保罪人，畢竟發電廠係排放廢氣污染地球嘅一大源頭。
政務司司長林瑞麟表示，二○一○年十月至去年五月，舊政府總部嘅電費開支每月平均約七十萬元，去年十月至今年三月，新政府總部嘅電費每月平均約三百四十萬元，其中包括承建商因進行執漏工程而用嘅電費。
問你怕未？一個月三百幾萬電費，足夠蝸居一族買個單位自住喇，浪費電力成咁，五勞七傷嘅地球先生多得你唔少啦！
煲呔曾一時快感，門常開一世遺憾。充滿無力感嘅小市民惟有希望七月一日快啲來臨，換個特首，送走瘟神。