失明維權律師陳光誠去到美國後高呼：「公義無國界！」之不過，香港十七萬公務員睇怕未必相信，點解？嗱！唔講唔知，原來過去五年，共有一千七百多名公務員因違法或違規被處分，其中六人因收禮物或行為失當被革職。有議員為公務員鳴不平，貪曾歎盡海陸空、貪遍省港澳就一啲處分都冇，譴責都冇，叫啲公僕點會服？
公務員事務局局長俞宗怡只好再一次上演「難為了家嫂」，無奈的再說：我只係負責規管公務員，最多係向特首辦轉達意見！
老朽唔知俞宗怡轉達咗乜意見，是否「學而優則士、士而久則大可貪」的道理？《論語‧子路》記載子貢問孔子具備甚麼才可以稱之為「士」，孔子回答：「行己有恥。」意思是說，人要有羞恥心，凡認為可恥的事就不去做。貪曾要貪到最後一分一秒，可謂無恥之尤！
治理國家不以百姓為念，一心享盡特權餘蔭，自然唔知道個「恥」字點寫！又講段歷史畀貪曾知，話說唐太宗有一次率兵東征，由於冬天蔬菜奇缺，他便曾對下屬說：朕從洛陽出發以來，只吃肉食，即使早春蔬菜也不吃，就是擔心煩擾百姓。唐太宗之所以有「貞觀之治」，除了納諫如流，更因為心繫百姓。
想起煲呔曾位極人臣，年薪高過奧巴馬，卻連菜心、葵花雞也貪，唔心翳就假！但願新政府撥亂反正，久不久整啲禮賓府大舊叉燒，送去深水埗等舊區畀街坊歎吓！