探射燈：港販商教揀靚雞
內地有黑心商人以精神科藥物餵雞，本港新界養雞同業會副監事長李良驥直言此方法聞所未聞。李指，業界一般會以風扇或水簾等硬件設施，為雞隻降溫，「風扇用嚟吹散熱風，水簾就係用抽氣扇抽風，等成個環境冇咁熱。」
「餵藥雞」疑東門有售
記者昨日亦到深圳東門的雞檔，發現上址不少檔口出售清遠雞。有檔販指，不少港人專程光顧，「依家已經有三隻雞留畀香港人，去晒毛o架啦！」亦有顧客透露，該處部分檔口出售的雞隻神情呆滯，木無表情，未知是否曾經餵藥。
至於本港雞販林太在獲悉內地疑有「啪丸雞」後，表示會避免出售相關來源地雞種。她指雞隻尾部大，代表雞隻肥美，腳粗則代表運動量多，肉質結實；市民亦可以用手撥開腹部雞毛，該處愈滑，則代表雞愈靚。另一雞販陳女士則教路，要買靚雞，應該選擇雞冠堅挺、「眼仔睩睩」及外形生猛的雞隻。