政情：肥亨勸戒煙 大打經濟牌
前中策集團主席馬時亨（肥亨）尋日佢出席葵涌醫院搞嘅「無煙繪畫大賽頒獎禮」，被大會形容為重量級嘉賓，但佢上台致辭時就話自己只係「輕量級」嘉賓，皆因近排身形輕盈咗，佢隨即好風騷咁打開西裝褸畀觀眾用對眼驗吓佢條三十二吋纖腰，結果令全場嘩聲四起，相當搞笑。
肥亨之後又喺台上分享對煙民嘅睇法，話吸煙呢件事本身就係個大笑話！佢話：「賣煙啲包裝都話『吸煙危害健康』，點解仲有人肯用幾十蚊買包煙嚟毒死自己咁蠢o架？」睇起上嚟，成件事並唔合乎經濟效益，佢仲好肉緊話戥啲煙民唔抵添！
怕未來女婿係煙民
肥亨仲講到明，叫細女拍拖千祈唔好搵煙民，驚未來女婿口臭同使晒啲錢買煙之外，仲怕個女後生就要守寡咁話。所以佢勸在場煙民要學似佢咁珍惜健康，盡快戒煙令自己個肺快啲由黑色變做充滿新鮮空氣嘅綠色喎。