泛民主派多個政黨講到明會就新政府架構問到底，候任特首梁振英（CY）連日撰寫網誌同撰文推銷新架構，候任特首辦主管羅范椒芬亦四出向議員解說新班子七．一齊齊上任嘅重要性。尋日羅太仲決定取消原定喺本月底嘅休假，選擇留港工作，除咗可能要取消預訂嘅機票同酒店外，仲有佢特登為旅行而買嘅單鏡反光相機，會否因而得物無所用呢？
羅太任期會到下月三十日，佢喺上月上任時已事先張揚本月廿八日至下月五日休假，計劃同家人到非洲旅行，諗住喺特首選舉過後鬆一鬆。不過，眼見泛民對新架構有理無理嘅一大堆質疑，羅太最終要放棄休假，但最慘應該係佢之前新買嘅單鏡反光相機，原本諗住可以用大約一個月時間摸熟部相機，點知後來接咗候任特首辦主管嘅工作，最後連假期都無埋，認真人算不如天算囉！