政情：潘潔耍官腔 曾鈺成投降
早前中電宣稱廉價電費時代終結，多位立法會議員尋日喺大會上，追問署理環境局局長潘潔幾時先肯研究開放電力市場，當局係咪已將開放市場主導權都交予兩電。不過，潘潔嘅答案一味耍官腔，聲言政府會繼續按《管制計劃協議》嚴謹把關，喺出年同兩電作中期檢討，總之答來答去都係咁，十足開着「人肉錄音機」，搞到班議員好唔耐煩。
面對潘潔嘅官腔回覆，就連建制派嘅劉江華都頂唔順要質疑政府嘅立場係咪有心引入競爭，點知潘潔回應話，政府唔可以單方面作決定。正當劉江華打算再追問之際，主席曾鈺成忽然出言阻止，事關佢認為潘潔已經答咗議員問題：「我聽到局長話政府嘅立場就係無立場！」
估唔到經歷過通頂拉布戰嘅曾主席，竟然都頂唔順潘潔冗長無物嘅答覆，索性當政府無立場算數。