財爺鬍鬚曾今個月中去台灣訪問，身為客人都唔分莊閒，全程以廣東話接受訪問，一啲都唔尊重人哋嘅場合。本來大家以為因為佢普通話差，唔想自暴其短啦，點知尋日佢出席CEPA（更緊密經貿關係安排）宣講會嘅時候，突然又講起普通話，真係一時一樣。
鬍鬚曾之所以忽然轉普通話頻道，原來尋日出席嘉賓包括國家商務部副部長蔣耀平、廣東省副省長招玉芳，乜嘢用意真係相當明顯。不過，平心而論，鬍鬚曾嘅普通話致辭依然係麻麻哋，講到甩甩咳咳，雖然未至於完全聽唔明佢講乜，但肯定係死記硬背咗好耐嗰種。
程度只係「有限公司」
其實佢啲普通話素來都係「有限公司」，呢幾年來就算唔係原地踏步，充其量只能形容為寸進，大家都無乜期待喇。