政情：自由黨選戰 腹背受敵
近期政途走偏鋒嘅自由黨，一向堅持「兩條腿走路」，即係要立法會功能界別同地區直選雙軌並行，但似乎事與願違，兩頭唔到岸。嚟緊九月立法會選舉該黨將受到幾面夾擊，除咗榮譽主席田北俊要喺新界東直選爭位打崩頭外，功能界別方面形勢都唔多好，一如我哋之前所講，航運交通界老行尊羅少雄鐵定退黨參選打對台，幾方面畀人夾來夾去，睇嚟該黨今屆選舉條路相當難行。
經濟動力林健鋒早前一次過搵十幾個區議員出席活動大晒冷後，自由黨榮譽主席田北俊尋日又照辦煮碗，一炮過叫咗十三位鄉事派人士出嚟，當中最有分量肯定係有「北區鄉事四子」稱號嘅上水、粉嶺、沙頭角、打鼓嶺四個鄉事委員會主席。四個鄉頭都話支持田少出戰新東，其中上水鄉委會主席侯志強揚言，四個鄉夾埋最少過到八千至一萬票畀田少，叫田少唔使擔心北區票源喎。
北區鄉事派喺○八年選舉幫過民建聯，今年選舉就話幫自由黨，但最後會唔會食兩家茶禮呢？侯志強好老實話，北區四子係「待嫁姑娘」，一直有好多政黨向佢哋招手，但佢哋心意已決，只會服務田少一人喎。眾所周知，自從田少「白票論」一出，好多人都驚該黨被西環封殺，粉嶺鄉頭李國鳳承認，撐田少的確受到唔少壓力。
羅少雄證實已退黨
有政界中人透露，現時西環向外發放嘅訊息係「無叫人唔支持自由黨，亦無叫人支持」，總之保持中立。不過，就算西環開綠燈，該黨選情亦好嚴峻，因為航運交通界劉健儀想轉戰港島區直選，有傳佢遲遲未搵接班人，搞到有傳想參選該界別嘅羅少雄話要退黨。羅少雄已向我哋證實已經退咗黨，已轉為「自由身」，佢話保持獨立身份會方便啲喎。究竟方便做乜嘢，大家心中有數，倘若參選，就會同自由黨打對台。
至於紡織及製衣界功能界別方面，該黨想派鍾國斌去挑戰現任經濟動力議員梁劉柔芬，但被傳係梁太嘅接班人、聯泰控股行政總裁陳亨利就似乎信心十足，話會同梁太好好合作喎，睇嚟自由黨今屆選舉將面臨一場硬仗。