中環出更：包山后鄭麗莎 打上大銀幕
搶包山冠軍「蜘蛛女」鄭麗莎（Lisa）近年人氣急升，日前佢就為國際培幼會喺演藝學院舉行「愛‧女孩」籌款活動中，同鮮魚行學校嘅同學仔合作表演詠春，有板有眼。卓妮同Lisa傾開，原來身手敏捷嘅佢會躋身大銀幕做打女，喺戲中飾演反派，動作場面都唔少，雖然未係女主角，但戲份多咗，小妮子已經好開心。齣戲將會喺八月上畫，大家密切留意喇！
周文耀為女性權益努力
國際培幼會（香港）主席周文耀當日一早到場，佢話今次籌款活動目的係全力支援內地、尼泊爾等地嘅女孩，為佢哋爭取應有嘅教育、醫療權利、杜絕人口販賣等不公平行為。大家以為香港女性享受平等待遇、好幸福啦，點知做過港交所行政總裁嘅周文耀仲未滿意，佢話香港啲大公司高層都係男人嘅世界，女士嘅職場地位仍有待提高喎。
卓妮