中環出更：他信現身香港有重任
自從前泰國總理他信（THAKSIN SHINAWATRA）出走泰國政壇後，至今眨眼間已經五年，依家到佢妹妹英祿（YINGLUCK SHINAWATRA）掌權，他信呢段時間離鄉別井雲遊四海，間中更現身香港，生活不知幾寫意。話口未完，卓妮尋日就喺尖沙咀發現他信嘅蹤影，仲從可靠消息得知，他信今次來港有重要任務，就係同中方有關方面接觸，將高鐵引入泰國，聽到真係「嘩」一聲！
尋日下午三點幾鐘，卓妮見他信同兩名男性華籍友人一齊喺尖沙咀海港城間COVA歎下午茶，神情輕鬆。他信作風好低調，只有一位女性秘書隨行，另有兩個護衞喺門外守候。大約個多小時後，食飽飽嘅他信大踏步行出餐廳門口，見到卓妮亦都好大方咁打招呼，態度非常親切。
他信話，佢近期嘅生活過得幾好，除咗開會之外，仲不時旅遊度假，走勻全世界。被問到點睇目前嘅泰國政治局勢，他信諗咗兩秒就答話，覺得愈來愈好，睇嚟佢對妹妹嘅管治能力好有信心喎。
計劃將高鐵引入泰國
再問他信想唔想返回泰國？佢忽然嚴肅起來，語氣堅定話：「I will go back（我一定會回去）！」但佢坦言，唔知幾時先至返到去，或者係不久嘅將來喎。咁會唔會喺一年之內呢？佢再重複答話唔知道。最後他信與友人一同登上豪華七人座駕離開，臨走前仲同卓妮揮手道別。
卓妮事後從可靠消息得知，原來他信今次來港係同中方有關方面接觸，計劃將內地高鐵引入泰國，據聞路線係由曼谷通往佢家鄉清邁，車程要七百幾公里，行車時間要逾十小時，但以時速三百公里高鐵嚟講，只需幾個多小時，無論對當地居民或是遊客嚟講，完全係便捷嘅交通工具，估唔到他信仲心繫泰國嘅福祉喎。
卓妮