網上「二次創作」多元化，好多都有創意兼具有諷刺時弊嘅功能，但有啲惡搞就惹來事主嘅不滿。講緊嘅係近日網上流傳一張有關民建聯立法會議員李慧琼（Starry）嘅街邊宣傳橫額，內容係呼籲市民「做個有公德心狗主，請妥善清理狗隻便溺」，原本橫額內容無乜問題，但偏偏「李慧琼」個名就放咗喺「狗隻」兩字下面，看起來變成「狗隻李慧琼便溺」。
由於有關橫額在網上瘋傳，Starry隨即喺社交網站facebook發出特別聲明，聲稱有關橫額並非出自其辦事處，而佢嘅同事經過相中嘅橫額懸掛地點，亦無發現有關橫額，實情係被人偽冒，由於過去亦曾試過被人偽冒製作橫額，所以已向警方備案。不過，既然Starry話無出過有關橫額，究竟張橫額係被偽冒製作掛喺街上，抑或係網上改圖，真係專家先至睇得出。
雖然Starry發聲明以正視聽，但此舉亦得失愛狗之人，有網民話以為Starry可以為狗請命，點知睇錯佢，所以九月立法會選舉唔投票支持佢喎。