唔少立法會議員為咗拉近同市民嘅距離，都會喺社交網站開設專頁。社區發展動力培育就做咗個調查，發現六十位議員當中只有四分之一係無用任何社交網站平台，而直選議員較功能組別用得多網上平台。時事評論員黃世澤就話，可能係因為功能組別議員成日開會都無發言，搞到唔知擺咩上網站好，佢仲揶揄「大懶蟲」金融界李國寶：「唔通將佢瞌眼瞓嘅次數擺上去咩？」
不過，就算議員喺社交網站開專頁，都唔代表佢哋嘅社區聯絡工作實做得好。調查發現好多議員開咗個專頁後都無管理，好似議員李國麟、李華明、梁美芬、陳鑑林等，喺調查期間都係零發貼、零回覆，好似隱形咁；但當然唔排除佢哋喺調查期間咁啱唔得閒啦。又有好多議員例如陳淑莊、劉健儀、陳克勤等，就算有發貼都係無乜網民回覆。黃世澤就估計，可能啲議員發貼內容太沉悶，睇完唔搵周公已經算唔錯喎。