前民政事務局局長何志平（肥平）離開政府後，依然熱心社會事務，由佢出任總裁、副主席同秘書長嘅中華能源基金委員會，嚟緊就會搞個「中美對話研討會」。今次請嚟嘅講者同嘉賓好有分量，包括原美國國家安全局局長兼原美國中央情報局副局長、原美國中央司令部司令、原白宮國家安全委員會資深戰略策劃主任等，粒粒巨星，真係唔講得笑。
今次研討會主題係「建立互信」，係繼今年一月中美兩地能源合作挑戰同機遇研討會後嘅另一主題，旨在共同推動中美兩國嘅互信同合作。
肥平喺今次研討會請到咁多猛人嘉賓，證明佢離開政府後嘅政治能量仍然係有番咁上下，但最令人諗唔明嘅係，點解佢喺基金委員會內要一人兼三職咁頻撲呢？唔通依家好難搵到好似佢咁嘅人才幫手？