政情：疑似局長棄美籍有保留
下屆政府司局長嘅人選大致已浮上水面，但當事人十居其九都話「唔評論」，而盛傳出任科技及通訊局局長嘅理大行政副校長楊偉雄（Nicholas）都唔例外，尋日出席活動時仲多次叫大家體諒佢喎！不過，被問到會否放棄本身嘅美國國籍加入政府，佢就話要睇情況，但不忘提醒大家話，其實由學術界轉入政府都唔係乜嘢新鮮事，前教統局局長李國章咪係一個好例子。
其實Nicholas喺科技業界人脈甚廣，業界亦對呢位局長熱門人選甚為受落，但係佢喺理大嘅任期至一五年先至完結，但佢就話任期呢樣嘢並唔係死線一條，相信會有得傾喎，好似為自己開路做局長咁。正當大家以為有關局長人選呼之欲出之際，Nicholas又忽然話，其實佢自己對耕種同釀酒都有啲興趣，希望遲啲研究吓點樣可以善用科技大量釀酒添！
估唔到善用科技釀酒都畀佢諗得出，唔知佢會唔會就研究「耕種」同「釀酒」，拉埋熱愛耕種嘅候任特首梁振英同愛好紅酒嘅唐英年一齊研究呢？