政情：老鴿食言 乳鴿條條Fing

高達幫老婆掃除障礙

自從白鴿黨決定由尹兆堅出戰超級議席後，呢位後生仔人氣急升，曝光率甚高，但一班白鴿黨大佬為咗打穩陣波，最近又勒住佢，叫佢唔好選，仲建議改派鐵頭仁同涂謹申雙雙出戰超級議席，以增勝算。由葵青區起家嘅尹兆堅，既然無得選超級議席，好多人都以為佢會去返新界西直選，但點知又無佢份，因為現時新界西白鴿黨已經有兩條名單，就係李永達（高達）同陳樹英兩公婆。

本來知名度勁低嘅陳樹英首次擔正，已經勝算唔高，如果再加埋尹兆堅分薄票源，最終可能得高達贏到一席，所以班白鴿大佬就勸佢等下屆再選。不過，據聞高達近日就諗縮數，建議尹兆堅排自己條隊嘅第二，咁做算係一石三鳥，一來可以安頓尹兆堅，二來可以借尹急升嘅知名度鞏固個人票源，最後就係幫老婆陳樹英掃除障礙，等該黨只係出兩條名單，唔使重疊票源。

有年輕黨員就慨嘆，白鴿黨明明喺會員大會上議決咗派出「尹涂配」參選超級議席，但依家一個屈尾十又變成「何涂配」，即係打倒昨日的我，加上兩人都係老鴿，話就話叫提高勝算，但到九月選舉，實被人圍攻該黨係老人化政黨，守舊唔進取，攬住個位唔肯畀乳鴿上等罪狀外，到時仲有無後生仔會投白鴿黨，相信班老鴿心中有數。

由於新界西已被高達兩公婆插晒旗，屯門、荃灣及葵青區都有人做緊嘢，搞到尹兆堅今屆選舉條條fing無揸拿，都唔知去邊好，睇嚟白鴿黨第二、第三梯隊上位無望嘅厄運，過多幾屆選舉都未必有改變。