新政府總部標榜「門常開」，誰不知一場黃雨，「洪水」由樓梯湧落樓，飛流直下三千尺，如激流瀑布，煞是好看！
事實上，耗資逾五十億元興建的添馬艦新政府總部，去年八月入伙前，已被揭為趕工致工程「甩甩漏漏」，且意外無數，更厲害的是變成毒樓，被驗出退伍軍人桿菌嚴重超標，搞到教育局局長孫明揚第一個中招。五十多億打造的特區政府心臟，竟成豆腐渣大樓，又成毒樓，騎呢到無人信！堪輿學家就話「門常開」的中空設計犯下「開膛殺」，如利箭穿心，加上今年水為災，本港經濟唔衰到貼地都唔得！
有識之士一早話「門常開」中間開咗個大窿，政府總部竟然冇心臟，你話點運作喇？如今果然醜嘅衰嘅都到眼前來！學者話齋：邊有國家或地區個政府總部有咁多問題？除了失禮，更加離譜！夕陽政府真係屋漏更兼連夜雨！煲呔曾好大喜功，貪得無厭，唔通真係有徵兆？《淮南子‧人間》云：「山致其高而雲起焉，水致其深而蛟龍生焉，君子致其道而福祿歸焉。夫有陰德者必有陽報，有陰行者必有昭名。」
老朽尤其認同最後兩句所說的，暗中施恩積德的人，一定會得到顯著的報償；不顯露德行暗中行善的人，也一定會得到顯揚的名聲。俗語亦說：「愛鼠常留飯，憐蛾不點燈。」然而，貪遍省港澳的貪曾卻愛吹水，尋且貪天之功，「門常開」可說是他急就章留下的「蘇州屎」！