政情：盛智文「待續」陷兩難
特首選舉時支持唐英年嘅盛智文，佢海洋公園主席嘅任期喺嚟緊六月尾就會完，至於之後何去何從，盛智文就話自己仍是「等待中」。不過其實盛智文已經做咗九年海洋公園主席，遠超任公職最多六年嘅不成文規定，如果再被委任或者會惹人詬病，但如果唔委任佢，又可能會被解讀成秋後算帳，CY今次真係左右為難。
近日有傳聞話，盛智文將會做多海洋公園主席至少一年。盛智文尋日就話，的確有相關人士同佢講過佢或者有機會繼續出任主席，不過一切係非官方消息，所以六月以後何去何從，佢話自己好被動，一切都係「等待中」﹗
盛智文不避嫌話，自己過去九年並無收人工，但都將海洋公園搞得好哋哋，如果單因「六年所限」所以唔畀佢繼續做主席，咁對佢都好唔公平。佢咁講不無道理，事關盛智文做海洋公園主席九年期間，園內不斷搞建設，入場人次節節上升，八度衝破年度入場人次紀錄，即使迪士尼開幕，入場人次仍有增無減，咁嘅業績，都好難炒佢啩。