政情：老屈張文撐剪布 曾鈺成變豬肉成
立法會拉布戰上周腰斬咗，但由此而來嘅爭議仲未完。立法會主席曾鈺成話有泛民議員（其實係民主黨張文光）同佢握手，即係話唔反對腰斬拉布。民主黨不滿曾鈺成「一味靠屈」，尋日帶備生豬肉到立法會示威，竟遇見張文光。張文光伸手同黨友握手打氣，黨友不約而同提醒佢唔好亂握手。
民主黨動員約十人喺金鐘海富中心集合之後，手持標語同生豬肉遊行去立法會，諷刺曾鈺成為求淡化事件竟砌泛民議員生豬肉，將握手嘅禮貌性舉動解讀成支持，明顯係誤導公眾。遊行剛起步，遊行隊伍即巧遇握手事件嘅主角張文光，張文光同黨友握手，黨友就叮囑張文光「握手要小心」。唔講唔知，原來張文光好鍾意同人握手。
負責招呼示威人士嘅立法會人員對生豬肉唔多欣賞，拒不接收。今次遊行負責帶隊嘅黃大仙區議員胡志偉話，為求視覺效果，寧願買貴價嘅「五花腩」作為示威道具，舊豬肉有三、四斤重，示威後如何處理，都要諗諗。