政情：月娥「撲」火 愈燒愈勁
候任特首梁振英同候任辦主管羅范椒芬都講過，希望下屆政府唔好只係救火，而係要將目光放遠啲，所以要喺政務司司長同財政司司長以下設立副司長。盛傳會做下屆政務司司長嘅發展局局長林鄭月娥，尋日出席活動時即上演一幕模擬「救火記」。見慣大場面嘅林鄭竟然畀滅火筒考起，睇佢雞手鴨腳咁，經過專人指導示範，仲係瞄唔準火頭。林鄭惟有尷尬笑笑口話，千祈唔好叫佢救火。
稻香集團喺火炭嘅物流中心參加「活化工廈」計劃，免租畀職業訓練局（VTC）搞中式餐飲業培訓學院。林鄭尋日做開幕禮嘉賓，參觀咗食物檢測實驗室同飲食博物館，仲睇埋3D影片添，一路林鄭只係「齋睇唔玩」，但喺一個職業安全物品展覽，林鄭就親身試下點樣用模擬滅火筒救火。
對唔準火頭
呢個係非一般滅火筒，因為火頭係用投射螢幕顯示，要拎起滅火筒按掣，隔空瞄準火頭，滅火筒嘅感應器識得發訊號撲熄火頭。因為操作要有技巧，專人一邊講解，一邊示範，林鄭都好留心聽架，但到佢親自救火就唔多掂檔。見佢一路將滅火筒噴嘴對準火頭，火頭竟然愈燒愈猛，火勢無細到，林鄭面對眾多嘉賓竟唔識用滅火筒，都咪話唔尷尬。側邊嘅專人即刻提佢：「要將感應器瞄準火頭先得架！」火種終於熄咗少少，但仲燒得好勁。試玩一輪嘅林鄭呢個時候只有放棄，仲以笑遮醜話：「如果叫我救火就唔得喇！」在場嘉賓都幫佢打圓場：「真係要訓練過先識用嘅。」
林鄭喺官場，以「好打得」見稱，如果真係好似盛傳中一樣會做政務司司長，今次救火經驗，唔知會唔會提醒咗佢要諗諗事先接受下訓練呢？否則入到場雞手鴨腳，火勢愈救愈猛就弊嘞。
至於副政務司司長個位由邊個擔任，據聞幾經波折都仲未確定人選。羅范椒芬尋日撰文話，副局長同政治助理如果無適當人選，寧願懸空，唔知呢個講法，包唔包括副司長呢？