中環出更：紅線女惜「梁」才 封CY做偶像

尋日紅線女身穿粉紅色長裙為大會獻唱代表作《荔枝頌》，雖然佢今年已經八十八歲，但依然中氣十足，聽得台下觀眾如癡如醉，拍爛手掌。紅線女之後仲盡顯調皮本色，攬住剪綵花球唔放，又送咗一幅親筆寫嘅字畫畀新光留念。

家英撐許曉暉踩阿姐

CY喺致辭時話，新光戲院得以繼續營業，自己只係略盡綿力，又話日後文化局會負責制訂文化產業策略，希望文化界嘅朋友可以多多支持。CY之後又默認民政事務局副局長許曉暉（Florence）會出任文化局局長，話中央肯任命嘅，相信都會係合適人選。名伶羅家英同樣對文化局有好大期望，家英哥仲話Florence應該會公平對待所有文化藝術團體，仲話如果由汪明荃做，反而會偏心粵劇界。

梁振英（前左）同新光戲院大劇場主席李居明（前右）為新光重開主持亮燈儀式。	港區省級政協委員聯誼會會長戴德豐（前左）見完梁振英後，拉住河南省政協梁高美懿（前右）見記者。	家英哥話，如果許曉暉做文化局局長嘅話，可以平衡各方利益。（李惠攝）

重新裝修後嘅新光戲院保留其一貫懷舊風格，大會只係翻新劇場嘅雲石大堂同坐椅，同增設音響燈光設備及數碼放映機。新光戲院大劇場主席李居明希望新光可以變成「東方百老匯」，集粵劇、舞台劇、演唱會同播放電影於一身。李居明本身係堪輿學家，卓妮問佢有無幫CY睇吓相算吓命，李居明就話無，因為有啲敏感喎。

CY尋日如常地繁忙，出席完新光開幕後，去咗灣仔一間茶餐廳食晏，跟住就去咗會見省級政協。

卓妮