死啦，有冇咁邪呀？莫非有人養鬼仔，專門向特區政府落降頭？如果唔係，點會黑仔得咁交關㗎！
嗱，功夫茶絕對唔係鼓吹迷信，不過世事嘅嘢無奇不有。最近有一個二十八歲香港男子，因為藏有六具巫術嬰屍「古曼童」而被泰國曼谷警方拘捕，揭發佢原來係台灣搵食嘅知名降頭師，嬰屍嘅作用係養鬼仔。落降頭呢家嘢，聽講好鬼死邪門㗎，中咗降頭嘅人身不由己，往往會做出無法理解嘅怪誕行為，或者遇上不可思議嘅詭異事件。
大家跟住落嚟一定會問，何以見得特區政府中咗降頭呢？不如咁啦，功夫茶反問大家，有冇見過一棟新簇簇嘅大樓，樓梯居然水長流變成洶湧澎湃嘅瀑布？
如果未見識過咁波瀾壯闊嘅濕滯奇景，大家就要去添馬艦新政府總部開下眼界嘞。總部大樓東翼側門有一條樓梯，昨日就滔滔不絕水長流，流到好似迷你版尼亞瓜拉瀑布咁勁揪。簡單咁講，新簇簇嘅立法會大樓嚴重水浸。
因乜事幹會嚴重水浸咁大劑嘅呢？建築學嚟講，當然係工程甩甩漏漏所致啦。堪輿學而言，九成就係風水出咗問題，或者功夫茶不幸言中，有人向特區政府落降頭，搞到頭頭碰着黑。
之不過咁，鬼神之說純粹參考嘅啫，完全冇科學根據㗎，要揭開新總部樓梯變瀑布嘅水浸之謎，其實最應該從政治學深入探討一下。一講到政治學咯喎，不得不提曾蔭權做咗特首七年，基本上毫無政績可言，反而醜聞就一大堆，自己間祖屋又非法僭建啦，兩公婆又黐實富豪吃喝玩樂啦，連去深圳搵闊佬提供廉租豪宅都夠膽死，臨收工先至晚節不保做咗一個接受廉署調查嘅貪腐特首。試問一個貪威識食嘅特區一哥，有乜可能領導二哥三哥做好監管工作？就好比一個縣太爺，連自己嘅縣衙都管唔掂，有乜可能管治好一個社區？
既然政治學上曾蔭權班子係一個失敗組合，所以相繼落成嘅添馬艦新政府總部以及立法會大樓都問題多多，唔係散播毒氣，就係暗藏惡菌。你知啦，問責高官一個二個貴體違和，好似教育局局長孫明揚咁吖，扶病上班捱義氣已經好冇陰功，一個唔覺意仲受到新政府總部嘅退伍軍人症桿菌侵襲，病上加病呀，該煨！
所以話啫，領軍人物好重要，食飯食粥靠晒佢。好似一支球隊咁吖，一輸波就要炒領隊，鬼叫你管治失敗呀。非常無奈嘅係，曾蔭權餐餐輸波，香港七百萬市民冇權下令炒魷魚。
新總部樓梯變瀑布，其實極具象徵意義，管治失敗水長流吖嘛，年年浪費咁多公帑養庸官，仲要為貪曾周遊列國入住總統套房埋單，同掟錢落鹹水海冇乜分別㗎咋！