政情：立會多會開 議員難分身

今、明兩日立法會一共有廿多個委員會會議進行，以今日為例，由八點九至下午四點半，整日四個時段，一共有八個委員會會議舉行，其中兩節有三個會議同時進行，早上有公務員事務局局長俞宗怡（D姐）出席公務員及資助機構員工事務委員會，解釋政府聘用非永久性居民嘅政策及措施，而下午嘅政制事務委員會亦會繼續討論下屆政府架構重組同埋委任官員加薪問題，呢啲會都係好重要嘅。

不過要講到重頭戲，一定係聽日直落共十四個委員會會議，唔少議員一日要連踩三至五個會。聽日由晨早八點半，已經有四個會議撞時間，緊隨下午有一手樓法案委員會，同一時間嘅民政事務委員會又會講吓設立文化局，兩個都係熱門話題，同場加映一個運輸業保險小組委員會，真係唔知應該去邊個會好。

阿涂好淡定 李慧琼苦惱

三個會都有份嘅民主黨涂謹申就好淡定咁話，啲會撞晒都無辦法，惟有黨友間協調得好啲，去得幾多得幾多啦，再加上白鴿黨會有研究助理喺辦公室睇住個會，即使有咩大事發生都可以即時通知佢返去開會喎。另一邊廂，民建聯李慧琼同黨友就仲未傾掂數，而佢亦正為今、明兩日共七個會議嘅走位而苦惱。

不過，對於啲細政黨嚟講，得一個議員好難話自己同自己協調，好似新民黨葉劉淑儀尋日就喊晒口咁話，預計末來兩日緊湊嘅議程將會好辛苦，分分鐘要日日朝九晚六，再加上星期五才由美國返港嘅佢話，自己到依家都仲未適應到時差，所以現時情況非常大鑊。

另外，鐵路事宜小組委員會受拉布影響兩度改期後，聽日終於開得成會，工聯會王國興應該會出席開會啦！因為委員會將會邀請港鐵出席為故障頻仍解畫。早前王國興因為西鐵訊號故障而遲到，令會議不足法定人數而流會，佢梗係要去開會問責一番啦！