中環出更：馬時亨暗寸高官無影
第四十屆「十大傑出青年選舉」尋日開始接受提名，前商務及經濟發展局局長馬時亨（Fred）同財務匯報局主席高靜芝（Sophia）獲邀做評審，尋日齊現身撐場。Fred致詞時話，呢個選舉充滿正能量，好應該得到政府支持，但係佢出席兩屆以來，從來未見過一個高官出現過，令佢好失望喎，似係暗寸高官唔夠勤力喎。
Fred意有所指話，香港有好多選舉，大部分都有好多醜聞，只有呢個傑青選舉發揮正能量，候任特首梁振英（CY）都係傑青之一。可惜選舉一直得唔到高官現身「給力」，所以佢希望CY上任之後，幾忙都要出席今屆選舉。
高靜芝坐大船唔暈浪
Sophia近日獲委任遴選委員會成員，協助新政府聘請副局長及政治助理，不過親情比工作重要，佢下周將赴美國羅省，探望高齡母親同兄弟姊妹。講到外遊，Sophia笑言從未坐過郵輪，佢唯一一次坐大船嘅經驗，係讀書時到日本出席國際學生會議，四日航程入面，個個同學暈船浪係咁嘔，得佢一個若無其事咁開餐，先至發現自己得天獨厚唔怕暈浪。