政情：侯志強食力簡 前後腳爆罵戰

上水坑頭村一名非原居民村長尋日下午喺村內舉行就職典禮，食力簡、多名民建聯要員，以及港府同警方都有派代表出席。

點知典禮開始前，有架車泊咗喺進出會場必經嘅通道中間，令準備前往典禮嘅車輛大排長龍，大批嘉賓被迫落車步行入村。

簡炳墀衝去村公所

期間更有人爬上典禮嘅巨型花牌，將出席嘉賓嘅名牌成個拆咗落地。其後食力簡喺多名黑超漢保護下，一邊爆粗，一邊衝咗去村公所門口，大叫「侯志強出嚟！」但叫極都無人回應。

隔咗大半個鐘之後，侯志強先至施施然咁現身，仲陪同阻塞通道嘅車輛車主一齊與在場嘅警員調停事件。

侯志強解釋，尋日同一時間「咁啱」有人喺附近舉辦活動，慶祝上星期嘅母親節，由於雙方嘉賓都要用呢條路，先至發生今次事件喎。

佢又不點名批評有人搞分化，「非原居民村長就職，無理由唔請原居民村長」、「有人輸咗咪算囉，最多下次選過，唔使搞埋啲咁嘅小動作」。由於當時食力簡已經走咗，變咗無嘢好睇。