中環出更：陳啟宗唐唐 狹路相逢 客氣寒暄一番
人哋話日頭唔好講人，力撐候任特首梁振英（CY）嘅恒隆集團主席兼亞洲協會香港分會主席陳啟宗（Ronnie），尋日喺匯賢智庫學苑講座重提特首選舉，話其實「豬後面嗰群就係狼」，暗踩選舉落敗嘅唐英年背後受到有勢力嘅人操控，點知呢頭講完就咁啱遇到唐唐。雖然兩人狹路相逢，但佢哋都好客氣咁打招呼寒暄幾句，但就企到離行離列囉。
由新民黨立法會議員葉劉淑儀做主席嘅匯賢智庫學苑，尋日原定喺灣仔小童群益會搞咗個題為中港融合嘅講座，仲請咗Ronnie做講者，點知Ronnie臨時建議將講座改喺佢位於金鐘正義道嘅亞洲協會舉行。Ronnie喺講座中提到做人要行得正、企得正，但諗起特首選舉就改口話：「行得正、企得正都無用，因為依家有樣嘢叫抹黑！」又話「豬後面嗰群就係狼」喎。
Ronnie焗問餐廳質素
Ronnie喺自己主場表現得非常好客，講座完畢後仲帶卓妮同其他講座人士遊覽前身係軍火庫嘅分會大樓。點知大夥兒去到大樓內嘅「AMMO」西餐廳門口時，唐唐就突然喺餐廳行出嚟，真係狹路相逢。正當兩人唔知講咩好之際，Ronnie惟有問唐唐間餐廳啲嘢好唔好食，又向在場人士介紹唐唐係「前任司長」。但相信無咩人唔識唐唐啩？最後雙方分道揚鑣。
原來唐唐係同太太郭妤淺及家人一齊食晏，佢話因為識得間餐廳嘅大廚，所以特登嚟捧場。不過，因為佢要準備下晝出席講座，所以要走先，趕住返屋企睇資料喎。至於唐太無幾耐都離開餐廳，卓妮見着住鮮色衫嘅唐太精神奕奕，佢話天氣咁好要出去行吓喎。
卓妮