立法會原定尋日朝九點鐘復會，但主席曾鈺成就引用議事規則將會議延遲半小時，理由係當時天文台已經懸掛黃色暴雨警告信號，加上有議員打畀秘書處話喺途中塞車，所以決定咁做。不過，成班泛民主派議員就鬧爆主席明顯係偏幫建制派，甘乃威質疑，天文台喺八點五十五分先發出黃雨警告，但為何秘書處喺八點三十九分已發送短訊通知議員延遲開會呢？主席係咪做咗天文台主任識預測天氣呢？
