醫學會會長選舉換屆在即，已擔任三屆會長嘅蔡堅如無意外會退下來，業界廣泛流傳兒科醫生謝鴻興將會參選，並且好大機會翻閹再做會長，但據聞今次未必可以好似四年前咁自動當選，有傳業界中人想挑戰佢，睇怕謝鴻興今次要有心理準備披甲上陣砌過喇！
醫學會一向論資排輩，謝鴻興○八年喺無對手競爭下自動當選會長，事隔四年後，尋日佢向我哋證實會再度參選，有資深業界中人估計只要佢獲得蔡堅支持嘅話，基本上再次擔任會長就十拿九穩，但今次佢未必得到蔡堅嘅祝福喇！有知情人士爆料，同蔡堅稔熟嘅業界中人有意參選會長，蔡堅為免左右做人難相信唔會表態支持邊個。
講開蔡堅，業界盛傳佢會參選九月立法會醫學界功能界別。蔡堅話，依家立會「好混亂，好無癮」，成班人都唔係做事玩拉布，政府又要陪佢哋癲，成件事都失控，所以要睇定啲先喎！