政情：麥齊光寸嘴 扮聾耍傳媒
前發展局常任秘書長麥齊光近期人氣急升，尋日接受電台訪問後就被記者圍住追問，問佢係咪會出任下屆政府嘅運輸及工務局局長，佢就笑住話唔會回答同四川重建工作無關嘅問題，又寸嘴反問記者：「消防局（局長）呀？你講咩局話？」搞到現場氣氛唔多好。其實正正經經話唔回應咪算囉，使乜搞到咁唔大方呢？
麥齊光一○年退休後無耐，就被發展局局長林鄭月娥「欽點」成為四川重建小組組長，睇實港府捐到四川嘅九十億元重建工程，單睇工程銀碼，就知佢幾受重用喇。佢尋日喺電台節目度簡單匯報吓依家個重建進度，對於會唔會為其他更重要嘅公務而放低四川工作，以及七月可唔可以正式退休等問題，佢就好負責任話，既然立法會批咗咁大筆錢，未搞掂就走好似唔多妥喎。
其實麥齊光又唔使咁執着嘅，佢就算加入新政府做局長，有關政策局都涉及工務範疇，都可以出師有名繼續睇實四川重建項目o架，一於將退休大計押後，疊埋心水為四川同香港服務。