政情：葉劉大反擊 擬告KK歧視
新民黨立法會議員葉劉淑儀終於去完美國出席囡囡嘅畢業禮，尋日可以返立法會繼續撳鐘否決出缺條例草案修訂。就喺葉太赴美期間，有報道就引述工聯會黃國健（KK）話葉太係「建制派逃兵」，葉太尋日一返立法會就進行大反擊，聲稱自己係單親媽媽，有責任照顧囡囡，又鬧KK唔尊重家庭價值，遲啲會去平等機會委員會投訴KK喎！
葉太話，佢喺美國除咗參加兩場畢業禮，仲用咗好多時間幫囡囡執行李，絕非好似某人所講話佢趁機去外國休息，對於某啲同事嘅批評覺得好遺憾，佢話會去平機會投訴有關議員違反家庭崗位歧視條例喎。KK話，已向葉太承認有講過有關言論，又話歡迎葉太告佢，佢重申只係想提醒葉太要做好議員嘅職責。
睇番紀錄，原來KK喺○九年都曾經因為要應港府要求留守香港支持預算案，搞到無得飛去澳洲出席囝囝嘅大學畢業禮之餘，太太仲差啲要同佢鬧離婚。今次葉太面對拉布戰危機都有得去美國出席囡囡畢業禮，唔知KK係咪因為心有不甘先至話葉太呢？