政情：立會打拉布 餐廳做不停
今次立法會出缺草案拉布戰，除咗帶挈一批金毛紋身臨記可以收錢扮示威者反拉布外，位於立法會大樓內嘅公眾人士餐廳亦受惠，生意額大大提升，尋日中午仲忙到連生意都做唔切，宣布暫停午餐外賣服務，但有關做法卻苦了一眾喺立法會採訪嘅記者。
叫乜冇乜 外賣暫停
立法會會期將近結束，各種大小會議排到密密麻麻，本已令立會餐廳生意大增。一連三周嘅出缺拉布戰，大批議員、記者同政府狗仔隊，齊齊日以繼夜、夜以繼日被困立法會大樓，當中唔少人都選擇喺最就腳嘅立法會餐廳醫肚，令食飯期間嘅餐牌食品成日叫乜冇乜。
尋日中午就仲離譜，有記者到餐廳準備食飯時，堂食無晒位之餘，外賣亦都因為做唔切而暫停，被迫轉往鄰近其他餐廳買外賣，有啲趕住寫稿同採訪嘅，更加被迫暫時絕食，唔知仲以為加入咗建制派反拉布行列。希望隨着拉布戰有望結束，餐廳快啲做番外賣生意喇！