中環出更：20蚊睇畢加索油畫雕塑

張松橋自認收藏畢作品

張松橋被稱為「最富有嘅重慶人」，係名副其實嘅低調富豪，尋日好難得佢與女伴一齊現身。佢話自己有收藏畢加索畫作，但唔喺今次展出嘅作品之中，話口未完就急急腳入場喇。尋日入場嘅名人雅士，仲有前梁振英競選辦副主任、明天更好基金行政總裁鄧淑德（Karen），依家新政府正在組班當中，但就未聽見Karen個名，佢笑稱基金工作好忙，下個月仲要出訪添！

因為巴黎國立畢加索藝術館大裝修，先至趁機將佢哋收藏嘅稀世珍品環遊世界展出，早前已經去過台北及上海，香港站嘅展期由即日起至七月二十二日為止。

陳正欣（左）及太太Angel力撐藝術活動。	鄧淑德話明天更好基金工作好忙，無回應加入新政府嘅問題。	名媛榮文蔚都嚟一睹為快。

市民將可近距離觀賞畢加索四十八幅油畫及七件雕塑，亦有一批畢加索嘅生活照及其創作嘅紀錄片。所以主辦機構特別提醒市民，入場時唔好拍攝，亦唔好帶任何大型、尖銳物件及液體，連水都唔帶得，以免珍品受損。

畢加索喺馬奈嘅名作搵到靈感，創作出名畫《草地上的午餐》。

畢加索名作《朵拉‧瑪爾肖像》，以側面和正面嘅輪廓重疊描繪女孩五官，追求「平面」嘅突破。

為避免太多人同時進場，大會將以城市電腦售票網讓公眾預訂三個階段嘅門票，又會採用分段式入場減低市民輪候時間。展覽嘅參觀時間由早上十時至晚上八時，門票劃一為二十元，但二十人以上嘅學校、註冊慈善及非牟利團體則可申請免費入場。香港文化博物館館長鄭煥棠教路，一般市民參觀前毋須先「惡補」藝術史，只要簡單預備一顆「欣賞」嘅心就足夠喇。

卓妮