開講有話，唔怕生壞命，最怕改錯名。曾蔭權上台七年，環保政策一塌糊塗，改善空氣一事無成，搞到香江臭名遠播，烏煙瘴氣，「氣候逃犯」實至名歸。
嗱，煲呔曾政府進入最後倒數階段，環保組織替佢埋單計數，發現「氣候逃犯」喺環保方面幾乎科科肥佬，改善空氣質素更加交晒白卷，遠遠不如董建華。以俗稱PM2.5嘅路邊微細懸浮粒子指標為例，回歸以來雖然略有改善，但大部分歸功於前朝嘅措施，完全唔關煲呔曾事。
環保組織提供嘅數據顯示，過去十四年銅鑼灣及中環錄得嘅PM2.5數據，的確變好咗，主要原因係董建華當年推出嘅更換石油氣的士及小巴、收緊柴油車廢氣標準及禁售含鉛汽油等，多管齊下，PM2.5濃度三年間顯著減少三成。
可惜到咗煲呔曾上台，情況就唔同嘞，佢為人縮骨走精面，環保得把口，講就天下無敵，做就無心無力，結果唔只一事無成，反而每況愈下添。環保人士批評，現屆政府只識沿襲前朝工作，就算有新措施，亦以試驗性質居多，軟弱無力，目標不清，缺乏實質效果，唔怪得藍天白雲愈叫愈走喇。
搞環保卸得就卸，一事無成唔在講，煲呔曾言行不一，其身不正，帶頭污染空氣，破壞地球，先至攞膽。本報前排踢爆，佢住嘅禮賓府原來係「食電怪獸屋」，每月電費接近廿萬元，足足等於一個中產家庭嘅二百倍。就算將政務司、財政司、律政司三座官邸加加埋埋，用電量都不及禮賓府三成。你話喇，煲呔曾究竟點樣用電？
上行下效，煲呔曾環保大隻講，其他官員有樣學樣，一味玩假大空。呢，環境局局長邱騰華身為問責官員，該做嘅唔做，唔該做嘅就亂嚟，任內毫無建樹，環保政績乏善可陳，擾民劣行就無日無之。例如膠袋稅呀、停車熄匙呀、擴建堆填區呀，簡直添煩添亂，劣評如潮。仲有吖，港府嘅空氣污染指標遲遲唔肯更新，幾十年如一日，更加成為國際笑話。前排有項國際調查指出，本港空氣質素喺全球排尾八，唔止輸畀新加坡幾條街，連菲律賓馬尼拉呢類落後城市都不如，真係羞家。
計功夫茶話齋，如果話煲呔曾係「氣候逃犯」，邱騰華就係「氣候逃兵」。一個逃犯加上一個逃兵，你話香港空氣點會好吖？港人又點可能見到藍天白雲吖？