曾經為官多年嘅平等機會委員會主席林煥光，稱得上係政界老手，佢尋日喺電台節目評論立法會出缺機制條例草案「拉布戰」時話，香港係法治社會，只要根據現有規則去表達意見，就應該跟從呢種規則去達成結論，除非有人違反咗遊戲規則，否則不能夠阻撓。佢又以球賽嚟比喻今次「拉布戰」，認為主動權喺進攻隊（建制派）一方，應該向對手嘅弱點進攻，而唔係只着眼對方嘅「拉布」喎！
