煲呔曾貪盡海陸空全城嘩然，原本早已要面對被立法會彈劾嘅議案，點知被立法會出缺安排條例草案「拉布戰」阻延，不過天網恢恢，立法會主席曾鈺成尋日出招「剪布」，彈劾貪曾嘅議案得以重見天日。未知貪曾係咪心知大限已到，有網民就踢爆佢前晚密會有「煲呔針」稱號嘅鄭經翰，睇怕極可能又坐埋諗啲「屎橋」企圖蒙混過關，但自作孽就肯定難逃一劫。
有網民爆料話，貪曾前晚八點鐘去咗香港數碼廣播搵「曾朋友」鄭大班傾密偈，隨即惹來其他網民議論紛紛，猜度佢哋唔知係咪又想搞局。我哋就密會一事問過傳聞中嘅當事人鄭大班，佢對此事無承認亦無否認，只係話唔認為私人事要同大家交代喎。話時話，鄭大班本身都自身難保，之前被傳媒踢爆佢大宅僭建一事已經搞到一身蟻，睇怕貪曾呢次真係所託非人喇！