政情：高鼎國無懼經濟放緩
法國總統寶座易手，連帶金融市場都出現震盪，港股仲有無運行呢？香港鐘錶業總會副主席高鼎國認為，外圍因素加上內地嘅調控措施，經濟高速增長嘅歲月恐怕已成過去。作為瑞士英納格大中華區總裁嘅高鼎國，同內地有好多生意往來，佢話近日發現內地好多人消費唔及以前豪爽，有漸趨審慎嘅趨勢，呢個現象反映內地經濟環境無復以往咁熾熱。
雖然經濟略為降溫，但高鼎國話未必係壞事，因為無可能年年持續有雙位數嘅經濟增長，況且經濟增速太快又會助長投機炒賣，以及加劇貧富懸殊嘅問題，反而細水長流嘅經濟發展對大眾更為有利。佢提醒大家應該要調節心態，去迎接經濟增長只得單位數嘅時代，但佢話內地嘅經濟環境仍比歐美地區好得多，所以認為毋須過分悲觀喎。