政情：根叔唔願走 玩殘接班人
立法會功能界別議員長期盤據議席，莫講令後生仔無機會上位，更令成個議會嘅平均年紀有增無減，最新例子係現年六十歲嘅漁農界議員黃容根（根叔）。據聞根叔原本都想「退伍」，搵咗個疑似接班人跟咗佢兩年幾，但最近根叔決定再坐一會，變相玩殘呢位疑似接班人。
漁農界過去一直由業界協調代表自動當選，有知情人士透露，根叔○八年成功連任後有意搵人接棒，據聞呢位疑似接班人係現年三十一歲嘅何俊賢，佢報稱係公司嘅董事，一直有心想為業界改善經營環境，亦曾經喺特首選舉期間陪同梁振英了解業界嘅需要。
據聞根叔近年都好栽培何俊賢，除咗畀對方學嘢同認識業界人士外，又喺選委會選舉預留席位畀佢自動當選為漁農界選委，原本一切安排都好哋哋，點知根叔最近疑似改變主意想再度競逐連任，唔知佢葫蘆裏面賣乜嘢藥。有知情人士形容，根叔此舉變相令何俊賢「條條fing」，我哋曾打畀根叔想了解吓件事，但最後未獲回覆。