政情：楊孝華為睇奧運拒拉票
前立法會旅遊界議員楊孝華（Howard）自從卸下議員包袱後，經常遨遊四海逍遙人生，佢上月先至結束澳洲嘅優悠旅行，旋即又要計劃行程準備出門，今次嘅目的地係英國，要親歷期待已久嘅倫敦奧運喎。Howard話，由於奧運同立法會選舉都係四年一度，所以佢過去為參選而無法身赴奧運會場，就算○八年無參選，但又因為公務而錯過北京奧運，所以今年不容錯過。
為咗一睹倫敦奧運，Howard已向自由黨告假，所以黨友嘅立法會競選工程就唔使旨意搵佢幫手喇。佢坦言，對倫敦奧運引頸以待，幾個月前已透過旅行社預購部分比賽項目嘅門票。不過，對於兵乓球決賽，Howard就唔會去睇，因為相信乒乓球獎牌係國家隊嘅囊中物，屆時肯定只係國家隊運動員之間嘅對壘，就算勝出亦無甚驚喜，倒不如留待精力去觀賞其他賽事喎。