政情：縮骨泛民 現身抽水
立法會明明有二十三名泛民主派議員，但今次反出缺機制草案拉布戰，來來去去只係見到「拉布四子」發言，即係人民力量黃毓民、陳偉業（大舊）、社民連梁國雄（長毛）及獨立鄭家富。至於民主黨（白鴿黨）、公民黨（公文袋）、民協等議員就大部分時間都變晒失蹤人口，不知去向，就算主席曾鈺成尋日朝早宣布腰斬辯論，佢哋依然唔見影，直至六個鐘頭後先至施施然走出嚟強烈譴責曾鈺成，佢哋嘅抽水能耐，真係十足衣櫃裏面嘅抽濕機。
呢場拉布持久戰打足咁多日，由最初得毓民、大舊再加長毛三位議員苦戰，到後期鄭家富加入，前晚更有工黨做雷霆救兵幫手拉布，咁其他泛民黨派究竟縮咗去邊呢？公文袋已事先講明唔會幫手拉布，只會喺議會外聲援，同埋整色整水提出無可能通過嘅終止待續辯論。但唔好忘記，兩年前五區公投佢哋就撐到底，依家就縮晒骨，係暗示自己當年做錯吖？定係佢哋轉咗軚呢？
白鴿一味「離場抗議」唔見人
至於白鴿黨仲衰，由頭到尾都翹埋雙手，一味以「離場抗議」做擋箭牌，更一度全程唔見人。仲有已被人遺忘嘅民協馮檢基亦唔好得去邊，同樣係失蹤人口，無人見過佢出現。其後曾鈺成決定腰斬辯論，要就草案修訂開始表決，而建制派何鍾泰更動議表決鐘聲由五分鐘縮短至一分鐘，呢個動議明明係拉布嘅黃金機會，可惜三黨議員統統失晒蹤。
當所有嘢都塵埃落定時，呢班所謂泛民先至凸個頭出嚟，聯署咗封信話要強烈譴責曾鈺成，仲話對曾主席嘅裁決感到震驚同憤怒。佢哋嘅選民就真係唔荒唔憤怒喇，點解當初曾主席提出腰斬辯論嗰刻佢哋唔及時阻止呢？莫非連表態都唔敢？聰明嘅選民一定唔會就咁放過呢班抽水議員，相信要佢哋喺九月立法會選舉票債票償。
除咗班泛民外，建制派有幾個人都無做好本分，好似新民黨主席葉劉淑儀，自從上星期飛去美國出席阿女畢業典禮後，一飛無回頭，畀建制派狂轟佢係「建制逃兵」。至於金融界李國寶依然故我，都係朝早返到立法會點一點名就走人，唔怪得佢話做議員嘥咗廿七年時間喇。