中環出更：李文恩鍾意跑步fit到震
跑步修身嘅效果好好，原來「造紙大王」理文造紙主席李運強二公子李文恩（Norman）都係靠跑步keep住鋼條身形。卓妮日前喺馬場見到Norman，佢話早前去咗揚州跑馬拉松，以五十分鐘輕鬆完成十公里路程，全因平時訓練有素。
當日Norman潮着Joyce細碼西裝外套及幼身領呔，配上窄身西褲，真係肥啲都着唔落。佢話自從今年初參加過馬拉松之後，發覺愛上咗跑步，自此堅持每星期跑三至四日，每次七公里，日子有功之下，身形愈來愈fit。早前佢喺江蘇公幹時，咁啱見到揚州舉行馬拉松賽事，於是參加埋一份玩吓。
講起買衫，Norman笑笑口話怕麻煩，通常一次過買晒一季嘅衫。不過，因為佢太太Lorinda同普遍女士一樣都鍾意行街shopping，所以佢點都會奉陪到底喎，真係廿四孝老公。
卓妮