中環出更：唐唐未來路向 袁莎妮送祝福
香港總商會為慶祝成立紀念日，喺本月廿九日又免費請市民乘搭電車同兩條渡輪航線，預料約三十萬人受惠。總商會主席胡定旭（肥胡）同總裁袁莎妮（Shirley）尋日就孖住出嚟推銷今次活動，仲叫齊三十幾個參與團體代表撐場，包括海洋公園主席盛智文、裕華國貨董事副總經理余鵬春等，不過Shirley依然係活動嘅主角。
大家一見到Shirley，好自然聯想起佢嘅前上司唐英年，近日唐唐話會思考未來路向點走，又有傳佢會退出政壇，選擇其他崗位繼續服務社會。問Shirley點睇唐唐嘅未來路向？佢就大笑兩聲回答話：「佢有自己一套諗法，無論佢做乜嘢，作為佢過去嘅下屬，我都會祝福佢嘅！」
講起搭「叮叮」，Shirley話電車確係港人嘅集體回憶，佢自細已經喺港島區居住，那些年經常同家人坐「叮叮」，依家都仲有幫襯，貪佢夠方便，唔使好似搭港鐵咁行上行落喎，依家有時仲會一家人夜晚去遊電車河，悠閒咁欣賞吓香港夜景。不過，問Shirley有無試過搭「叮叮」拍拖，佢就笑而不語喇！
肥胡被問去向耍「太極」
唐唐去向未明，而一向係唐營支持者嘅肥胡，亦都唔肯交代自己嘅去向。有人問肥胡會否續任下屆醫管局主席，佢就話自己任期去到年底，依家講續約係言之尚早，之後仲大耍「太極」叫大家唔好問佢呢啲嘢，應該寫多啲電車喎，跟住極速竄入升降機鬆人。
卓妮