政情：夕陽政府關照林偉強
夕陽政府用人唯親，惡行罄竹難書，雖然任期只係剩低一個月鬆啲，但仍然堅持親疏有別嘅施政方針。政府早排出手打擊元朗荔枝山莊霸佔官地個案，發展局局長林鄭月娥信誓旦旦話唔會容忍「先斬後奏」，絕不會批出短期租約畀啲先霸地、後申請嘅人。言猶在耳，原來局長都有睇漏眼嘅時候，屬下地政總署竟然批出短期租約畀一幅畀人霸咗幾十年嘅官地，事件原來仲牽涉新界鄉議局副主席林偉強添。
香港去年開始刮起反僭建風暴，唔少鄉紳都牽涉其中，就連林偉強亦唔可以置身事外，畀人揭發佢霸佔位於坪洲祖屋正門外嘅官地。事件曝光，加上有人向地政總署投訴，政府為咗息事寧人，係咁意審批吓，竟然喺去年七月批出短期租約，簡而言之，林偉強霸官地嘅行為自此就被合法化。呢種處理手法，好明顯就同局長所講嘅截然不同，究竟點解會咁，真係希望局長問番地政總署，如果唔係，人人都要用同一方法處理，咁佢就煩嘞。
無公職照入滅罪委員會
政府部門特別善待林偉強絕對唔止一單，好似民政事務總署咁，最近委任各區嘅撲滅罪行委員會時又再涉嫌明益佢，將本來已經失去晒所有地區公職嘅林偉強，委任入離島區撲滅罪行委員會，反而現屆坪洲鄉事委員會代表同區議員就無份，呢個決定已經惹起地區人士不滿，誓言要追究到柢。
林偉強做咗幾十年離島區議會同坪洲鄉委會主席，前年畀選民一鑊炒起，接連冇晒鄉委會主席、當然區議員同區議會主席職位。去到舊年，就連屬於佢陣營嘅坪洲區議員馬鎮添，亦喺區議員選舉輸埋畀現屆鄉委會副主席安慶英；本來大家都以為佢喺地區冇晒勢力，不過你唔好理，最緊要有腐敗嘅政府照住，結果又獲委任入去做地區諮詢組織。
究竟點解政府部門要咁關照林偉強？唔通單單因為佢係鄉議局副主席就可以有咁多特權？我哋尋日試過打畀林偉強，不過一如既往，冇人接電話；我哋又嘗試就事件聯絡現屆坪洲鄉委會主席黃漢權，佢簡單一句就總結咗成件事：「有正常智慧嘅人一睇就知乜事啦，唔使我多講。」個人容易話為，喺政府眼中可能就係一大優點囉。