中環出更：喇沙80歲生日 校友聚首憶趣事
老牌名校喇沙書院今年八十歲，前晚喺會展大搞校慶兼籌款，筵開百二圍，唔少名人校友到賀，仲出錢出力，前高官施祖祥更一早寫定支票捐畀母校添。施祖祥係六四年畢業生，同屆仲有貿發局主席蘇澤光。佢憶述那些年嘅趣事，話當年啟德機場仍在，校園上空常有飛機飛過，同學們好百厭，大叫同飛機鬥大聲，搞到老師冇晒符。
前律師會會長黃嘉純喺喇沙小學直升中學，讀咗十三年，對母校感情深厚，依家做埋籌款委員會主席，目標籌二千萬，推動電子校園計劃。講到難忘趣事，佢話當年愛整蠱同學仔，佢試過冒充孔教學院院長湯恩佳個仔湯偉倫個名，報名去學非洲話。
曾華倩囝囝最愛游水
電視藝員曾華倩囝囝Martin剛升中一，已經高過媽咪，華倩話囝囝最愛游水，仲拎過唔少獎添。校友李宗德就有感而發話當年校園生活輕鬆愉快，依家學生讀書壓力太大，希望同學懂得釋放自我。