違泊嚴重塞爆元朗
元朗新巿鎮現有交通配套早已超出負荷，令違泊日趨嚴重。巿中心咪錶車位勁缺，令又新街一帶常出現違例雙行泊車，危及行人及駕駛者。警方承認去年至今共發出逾四千六百張告票，數量驚人。區議員促運輸署認真規劃並檢討道路設計成效，以切合社會需要。
馮先生居於元朗大棠，並以私家車代步，多年來發現市內車位奇缺，以露天咪錶泊位尤甚，「我揸出嚟買嘢都係半個鐘左右，但試過一個鐘都搵唔到位泊！喺街邊停一陣又要收牛肉乾！呢區根本就唔夠位，咁即係逼人違泊！」馮指又新街、康景街、建業街及合益路的違泊問題最為嚴重，擔心一旦發生意外，消防車亦難以進入救災範圍，後果堪虞，認為政府有必要研究對策。
路窄經常搞到人車爭路
元朗區議員呂堅承認，元朗市路面交通阻塞嚴重，多年來未有改善，隨着元朗人口增加，停車場及路邊泊車位更加供不應求，「呢幾年元朗市起咗好多大型屋苑，加上錦田、八鄉又開始發展，多咗人喺元朗市區活動，但車位就冇增加，搞到冇位泊車嘅問題愈嚟愈嚴重！」呂認為當局須就現有情況重新規劃，以切合社會所需。
「元朗市嘅行車路本身已經窄，咪錶位又比較少，加上停車場位置唔方便，搞到人車爭路！」元朗區交通及運輸委員會主席陸頌雄認為，雖然加設路旁泊車位客觀上存在困難，但運輸署亦責無旁貸，「運輸署應該搵吓有冇適合地方劃做泊位，仲要檢討依家嘅道路設計係咪符合市民需要！」
警方發言人證實，去年一月至今接獲七百三十八宗有關上址違例泊車及車輛阻塞投訴，警方已根據「靈活執行交通法例政策」檢控違例車輛，共發出超過四千六百張交通違例告票。
運輸署發言人則解釋，元朗市現時約有六百多個公眾收費咪錶泊車位及八個私人營運停車場，部分為過去十五年內增設，認為現時元朗市泊車位供應足夠應付需求。發言人續稱，元朗市內車輛及行人流量甚高，上、落客貨活動頻密，難以騰出空間設立路旁泊車位，但承諾於元朗市新發展項目中加入條文，要求預留足夠泊車位予車輛在建築物內停泊。
市民埋怨
霍先生：「呢度車多位少，無論咩時間都係咁難泊車！」
陳先生：「呢度啲車位成日爆滿，試過等一個鐘先有位，亂泊又驚畀人抄牌！」
記者：陳倩儀、攝影：林松澧