食藥救命變攞命，認真大劑！
《東方日報》及《太陽報》率先揭發有本港藥廠生產嘅中成藥膠囊含重金屬鉻，仲要超標逾四十倍！
要不是本報率先踢爆，食衞局局長周一鑊同衞生署署長林秉恩，睇怕仍無動於衷，任由問題膠囊繼續危害市民健康！所以話乜權都可以冇，即使餘蔭嘅權都可以掃走晒，唯獨傳媒第四權唔可以冇，東方報業集團特別捍衞新聞自由，讀者應明白意義喺邊喇！
夕陽政府，睇嚟真係hea到最後一秒，衞生署署長林秉恩因本報查詢，才悠然從夢中驚醒，知道要「做嘢」，勒令回收問題藥廠出產嘅合共三十五款膠囊藥丸！
周一鑊同林秉恩向來對有毒食品及藥品都係後知後覺，明明係失職都仲要死撐，佢話註冊中成藥有近萬隻，無打算逐一化驗，只要求藥廠自願提交化驗報告。阿哥！做官做到咁被動，家陣毒膠囊事件爆發至今，當局唔好話冇逐一化驗，而係一件都冇化驗！打個比喻，即係一個春風化雨嘅教師，一個學期竟然未曾改過一本學生嘅習作簿，學生唔交功課又唔追，要佢哋自願提交，你話係唔係失職？唔係！係瀆職！
周一鑊同林秉恩，老朽奉勸兩位都係「知所進退」吧，唔讀神學可以去苦修冥想，有啲派系基本修行就是長年不說話，最啱兩位「開口夾着脷」嘅參與，祝生活愉快！