政情：「年輕」陳永棋 仲想做政協
出年全國人大代表同政協換屆，政圈盛傳，做過兩屆政協嘅陳永棋會退下政協常委一席。陳永棋日前斬釘截鐵咁否認呢個講法，話自己今年先至六十五歲，有足夠經驗同能力做多一屆。佢仲講笑話可能自己個樣比較蒼老，所以先會成日畀人誤會佢過咗七十歲喎。
陳永棋話，喺百幾個港區政協委員入面，好多委員都連續做咗兩屆政協，又話政協最多可以連做四屆。對於政協年過七十就一定要退下嘅講法，陳永棋自嘲話可能個樣比較蒼老，所以先畀人誤會佢已屆退休年齡，之後佢仲打開銀包，打算攞張身份證出嚟，證明自己其實只得六十五歲。
另外，有傳廠商會中人嫌現屆立法會議員林大輝唐營背景太重，可能會換人，由前立法會廠商會代表呂明華挑戰大輝，陳永棋話如果大輝願意出選嘅話，廠商會一定會全力支持喎。
至於大輝會唔會爭取連任，陳永棋話呢啲咁重要嘅事就要問番大輝喇，佢唔可以代答喎。