監警會日前公布的調查覆核，對北大人訪港期間，多宗涉及新聞自由的事件，包括G4阻鏡頭案、警員無理查女記者手袋案以及G4總督察威脅以貨車阻記者案，投訴警察課的調查證明投訴全部屬實。
好明顯，警隊一哥當天在議事堂嘅「黑影」同埋「卡手」論，除了謊話就是為警方打壓新聞自由護短！一哥曾「義薄雲天」咁話：「因為執法而要道歉是天方夜譚！」老朽只能說，若然知過而不改，而堅持唔肯道歉講聲「鎖你」，咁就係孭住「真過錯」一世難以暢通咁呼吸！
喺貪曾嘅無能管治下，香港已失去「廉潔奉公」嘅招牌，如果連第四權嘅傳媒，即係新聞自由都冇埋，咁香港好快就會成為妖獸都市！
講真，如果唔係有正義傳媒在，令到啲牛鬼蛇神無所遁形，叫啲反中亂港者咪妖言惑眾，香港都唔知會再亂成點！香港仲有乜鬼嘢核心價值？
一個人死牛一邊頸，知錯唔認，或者堅持一錯到底，咁就大鑊。位高權重，要做到知錯糾錯，其實要靠人監督，最重要就係第四權嘅監督，如果冇正義傳媒嘅監督踢爆，睇怕貪曾下台最後一秒，可能仲喺富豪遊艇上食緊豉油王炒麵同啃緊豬骨粥。一個人知錯能改，除了虛心受教，亦要有自知之明。
警隊一哥曾偉雄，老朽洗淨耳朵，希望能聽你向市民及新聞界講聲「鎖你」！但願老朽的小小祈盼唔係天方夜譚！