幾個月後就到立法會選舉，一眾參選人為吸引選民注意，真係無所不用其極。好似新界社團聯會（新社聯）一班青年咁，尋日着校服扮學生示威，為普羅學生爭取巴士半價優惠。不過，最特別係佢哋戴條粉紅色呔，似足候任特首梁振英（CY）近期成日戴嗰條呔款，唔通係向對方交心？
準備擔大旗循新界西直選嘅新社聯副理事長陳恒鑌話，條呔係新社聯會呔，同CY無關，但佢哋一向支持CY，就算真係品味相似都無所謂喎。
尋日嘅示威隊伍中，仲見到新社聯「第一梁粉」北區區議員劉國勳，同埋佢老婆呂迪明，佢兩個都被傳有機會加入政府，但最終結果仲未知。